FLASH NEWS
आज: २० श्रावण २०७८, बुधबार | Wed, 04, Aug, 2021 Gokarneshwor TV HD

एमाले बैठकमा नेताहरूमाथिको अनुशासन कारबाहीले पार्ने असरबारे छलफल

गोकर्णेश्वर खबर५ श्रावण २०७८, मंगलवार १९:५१ मा प्रकाशित (२ हफ्ता अघि) ५७ पाठक संख्या

काठमाडौँ– नेकपा एमालेको केन्द्रीय कमिटी बैठक भोलिसम्मका लागि स्थगित भएको छ ।

आजको बैठकमा प्रदेश कमिटीहरुका तर्फबाट प्रदेश कमिटी प्रमुखहरुले रिपोर्टिङ गरेको प्रवक्ता प्रदीप ज्ञवालीले जानकारी दिए ।

प्रदेश कमिटीका तर्फबाट सुझाव र प्रतिवेदन बैठकमा आएको र भोलि ३ बजे बस्ने बैठकमा महासचिवले त्यसको जवाफ दिने प्रवक्ता ज्ञवालीले जानकारी दिए ।

बैठकमा प्रदेश कमिटीहरुले केही नेतालाई कारबाही गर्दा पर्ने असर र पार्टीको अवस्थामा बारेमा सुझाव दिएको भन्दै प्रवक्ता ज्ञवालीले भने, ‘भोलि पार्टीबाट केही मानिस बाहिरिँदा आसन्न निर्वाचनमा कस्तो हुन्छ भन्नेबारेमा प्रतिवेदन र सुझाव समेत दिनुभएको छ ।’

बैठकमा एमाले विवाद समाधानका लागि गठन भएको कार्यदलले गरेका कामबारे संयोजक सुवास नेम्वाङले बैठकलाई जानकारी गराएका थिए ।

प्रवक्ता ज्ञवालीले भने, ‘कार्यदलको तर्फबाट सुवासचन्द्र नेम्वाङले पार्टी एकताको प्रयासका चरणहरु, दश बुँदे सहमतिका बारेमा बैठकलाई जानकारी गराउनुभयो । कार्यदलको प्रस्ताव हिजो नै अनुमोदन भइसकेको छ ।’

प्रधानमन्त्री शेरबहादुर देउवाका पक्षमा मतदान गरेका २२ जना सांसदहरुलाई स्पष्टीकरण सोध्ने निर्णयका बारेमा भने आज कुनै छलफल नभएको उनले बताए ।

भूमिहीन, सुकुम्बासी र अव्यवस्थित बसोबास गरेकाहरुलाई व्यवस्थापन गर्न ओली सरकारले गठन गरेको भूमिसँग सम्बन्धित आयोगका अध्यक्ष देवी ज्ञवालीले समेत आयोगले गरेका कामको बारेमा जानकारी गराएको प्रवक्ता ज्ञवालीले जानकारी दिए ।

सरकारले राजनीतिक पूर्वाग्रह राखेर आयोग खारेज नगर्न समेत उनले आग्रह गरेका छन् ।