FLASH NEWS
आज: ७ असार २०७८, सोमबार | Mon, 21, Jun, 2021

सरकारी प्रयोगशालामा निशुल्क कोरोना परीक्षण गर्न जान मन्त्रालयको आग्रह

गोकर्णेश्वर खबर२० जेष्ठ २०७८, बिहीबार १६:४५ मा प्रकाशित (२ हफ्ता अघि) ९६ पाठक संख्या

काठमाडौं । स्वास्थ्य तथा जनसंख्या मन्त्रालयले कोरोना भाइरस परीक्षणको दायरालाई अझै विस्तार गर्ने जनाएको छ । मन्त्रालयका प्रवक्ता डा कृष्णप्रसाद पौडेलले कोरोना परीक्षणलाई अझैं बढाइने जानकारी दिए ।

अहिले परीक्षण घट्नुमा केही कारण रहेको भन्दै मन्त्रालयको मनसाय परीक्षणलाई घटाउनु नरहेको उनको भनाई छ । ‘संक्रमितहरूको संख्या घट्दो छ तर परीक्षणको अनुपातमा ३० प्रतिशतभन्दा बढी पोजेटिभ आउनुभएको छ। त्यसैले हाम्रो परीक्षण अझैं बढ्नैपर्ने छ, घटाउने मनसाय छैन। बढोस् भनेर पालिकाहरूमा एन्टिजेन किट पठाएका छौं,’ उनले भने।

अहिले देशभर कोरोना परीक्षण गर्ने ९० वटा प्रयोगशाला रहेको बताए । उनले त्यसबाट दैनिक २२ हजार बढीको परीक्षण गर्न सकिने जानकारी दिए । तर अहिले २२ हजारभन्दा बढीको परीक्षण गर्न सकिएको छैन ।

जसमा पहिलो पक्का संक्रमण भएर थाहा भएपछि मात्र परीक्षण गर्न जानु र सामान्य लक्षण भएकाहरू परीक्षण गराउन नजानु रहेको उनको भनाई छ ।

निषेधाज्ञाले मानिसहरूलाई आवतजावतमा थोरै समस्या हुँदा परीक्षण गराउन जान उत्साहित नभएको उनले बताए । लक्षण भएका र कन्ट्याक्ट ट्रेसिङमा परेकाहरूको सरकारी प्रयोगशालामा निशुल्क परीक्षण हुने भन्दै ती मानिसलाई परीक्षण गर्न जान प्रवक्ता पौडेलले आग्रह पनि गरेका छन् ।

पुनः एन्टिजेन परीक्षण शुरु्र
काठमाडौँ महानगरपालिकाले आजदेखि पुनः एन्टिजेन परीक्षणलाई निरन्तरता दिने भएको छ । कोभिड–१९ को महामारी अझै नियन्त्रण नभएकाले यसको प्रभाव कम नभएसम्म निरन्तर एन्टिजेन परीक्षण गर्ने तयारीअनुरुप आजदेखि परीक्षण कार्यलाई सञ्चालन गरिएको हो ।

यसका लागि प्रत्येक वडाले आफूअनुकूल केन्द्र बनाएर परीक्षण गर्ने महानगरपालिकाको जनस्वास्थ्य विभागका प्रमुख हरिबहादुर कुँवरले जानकारी दिए । उक्त परीक्षणबाट तत्काल रिपोर्ट आउँछ । त्यसपछि पोजेटिभ देखिएका बिरामीलाई आइसोलेशनका माध्यमबाट समुदायबाट छुट्याउँदै लाने योजनाअनुरुप परीक्षणलाई निरन्तरता दिइएको प्रमुख कुँवरको भनाइ छ ।

कोभिडको लक्षण देखिएका, कन्ट्याक्ट ट्रेसिङमा परेका, अग्रपङ्क्तिमा रहेर काम गरिरहेका, निषेधाज्ञाको समयमा काम गरिरहेका र जोखिममा रहेका सबैलाई लक्षित वर्ग मानेर परीक्षणलाई निरन्तरता दिन लागिएको हो । लक्षित समूहमा पर्ने वा शङ्कामा रहेका सबै व्यक्तिलाई आफूलाई पायक पर्ने केन्द्रमा गएर परीक्षण गराउन महानगरपालिकाले आग्रह गरेको छ ।

कोरोनाको शङ्का भएका जो–कोहीले महानगरका ३२ वडामध्ये कुन वडामा जानकारी गराउन सहज हुन्छ, सोही वडामा जानकारी गराउनु पर्नेछ । जानकारीअनुरुप परीक्षण टोलीले नजिकको परीक्षण केन्द्रबाट जाँच गर्ने व्यवस्था गरिएको छ ।

यसअघि यही जेठ १४ देखि १८ गतेसम्म विशेष अभियान नै सञ्चालन गरेर ५० हजारको परीक्षण गर्ने लक्ष्य लिइएको महानगरपालिकामा पाँच हजार ७६० जनाले मात्र परीक्षण गरेका थिए । त्यसमा ४७९ को रिपोर्ट पोजेटिभ आएको तथ्याङ्कमा उल्लेख गरिएको छ ।

ठूलो समूहमा परीक्षण गर्ने भने पनि सोही समयमा बन्दाबन्दी कडा बनाइएकाले सोचेअनुरुप परीक्षण हुन नसकेको विभागको भनाइ छ । यसका लागि महानगरपालिकाले इपिडिमियोलोजी तथा रोग नियन्त्रण महाशाखासँग सहकार्य गरेको थियो ।