आज: १५ चैत्र २०८०, बिहीबार | Thu, 28, Mar, 2024

नेकपा विवाद नटुंगिदासम्म कांग्रेस पर्ख र हेरको अवस्थामा रहने

गोकर्णेश्वर खबर१३ फाल्गुन २०७७, बिहीबार २३:३१ मा प्रकाशित (३ साल अघि) ४०९ पाठक संख्या

काठमाडौं – प्रमुख विपक्षी नेपाली कांग्रेसले नेपाल कम्युनिस्ट पार्टी (नेकपा) विवादको अन्तिम टुंगो नलाग्दासम्म कुनै पक्षसँग सहकार्य नगर्ने भएको छ ।

बिहीबार पार्टी सभापति शेरबहादुर देउवाको निवास बूढानीलकण्ठमा बसेको पदाधिकारी र पूर्व पदाधिकारीहरुको बैठकमा संसद पुनस्र्थापना भएपछि उत्पन्न राजनीतिक परिस्थितिबारे समिक्षा भएको थियो ।

प्रतिनिधिसभा विघटनको निर्णय बदर गर्ने सर्वोच्च अदालतको फैसलाले संविधान र संसदीय प्रणालीलाई बचाएको वरिष्ठ नेता रामचन्द्र पौडेलले बताए ।

बैठकमा सभापति देउवाले नेकपाको दुबै पक्षबाट सहकार्यको प्रस्ताव आएको भन्दै राय मागेका थिए । जनताले पनि प्रतिपक्षमा बस्ने म्याण्डेट दिएको भन्दै नेताहरुले सरकारमा जान हतार गर्न नहुने बताएका छन् ।

नेकपा विभाजन भएर सरकार बन्नै नसक्ने अवस्था आए मात्र यसबारे पार्टीमा छलफल गर्नु उपयुक्त हुने नेताहरुले बताएका छन् । ‘संसदीय प्रक्रिया केही सुरु भएको छैन । यो अगाडि नबढी कांग्रेसले गर्ने भूमिका खासै केही छैन’ बैठकपछि नेता पौडेलले भनेका छन् ।

नेकपाको विवाद अन्तिम टुंगो नलागेसम्म कांग्रेस कसैको पक्ष वा विपक्षमा उभिन नसक्ने आफूहरुको निष्कर्ष भएको नेता अर्जुननरसिंह केसीले बताए ।